Was isch Wasserfahre?

Wasserfahre isch e traditions Sport, bi däm Kraft, Geschicklichkeit, Geschwindigkeit und Technik geforderet sin. Es goht drum e Parcour mögligscht schnell abzfahre. Wichtig isch do drby, dass me d Boje, wo d Fahrstrecke markiere, ohni z berühre umfahrt. Flussufwärts wird mit m Stachel vorwärts gstosse, Fluss abwärts bedient me sich denn am Ruder. De Sport wird elei als Stüürmaa oder zu zweit mit Vorder- und Hintermaa usgüebt, debi gohts nid nur um s eigene Könne sondern au um d Koordination im Team.

Im Wasserfahrsport hänn mr im Johr 5 - 10 Wettfahre in dr ganze Schwiiz vrteilt. Als Wasserfahrer chunnsch aber nid nur umme und lernsch uf allne Gwässer z fahre sondern de lernsch au no super Lüt kenne, chasch so also au no dis eigene Netzwärk wiiter usbaue.

Di Verein!

Mir sin de Wasserfahrvrein Rhywälle Basel uns gits scho sit 1934 do z Basel, grad unterhalb vo dr Schwarzwaldbrugg. Bi uns chasch dä lessigi traditions Sport erläbe und fit bliibe, näbscht däm chasch bi uns Rümlichkeite für Aläss, sowie au unser Langschiff für dini Events miete.

In unserer Familie sin alli willkomme - Mäld di !

Anstehende Termine

Training

Ob im Summer oder Winter, bim Weidlingfahre wirsch und bliibsch fit.
Jedi Wuche träffe mr uns zwei mol, grad unterhalb vo dr Schwarzwaldbrugg, zum gemeinsame gführte Training. Das ganze findet jewiils am Ziischtig und Donnstig vo 1800 bis 2000. An allne andere Täg findet kei offizielles Training statt, was aber nid heisst dass me nid trotzdäm dörf cho trainiere oder e Freifahrt go mache.

Zuedäm praktische Fahre wärde unseri Aktive au regelmässig in Knotekund unterrichted - Was au im private vo Vorteil si cha. 

Wieso chunnsch nid au du mol uf e koschteloses Schnuppertraining vrbyy und wär weis viellicht bliibsch au du bi uns hänge?

Trainingsbestimmige

1. Alli Trainingsteilnähmer sin sich sälber um e entsprächendi Haftpflichtvrsicherig bemüeht.
2. S Training beginnt pünktlich und me chunnt entsprächend vrpflegt und Mental bereit.
3. Bi unsichere Vrhältnis bzw zu hohem Wasserstand findet kei Training statt. 
4. Mir hänn zämme Spass! Witz sin erlaubt.

Gratis Probetraining

Wenn de mol willsch go luege chasch di grad do ischriibe, denn nämme mr uns Ziit für di und zeige dir dä lessig Sport.

E Probetraining isch gratis und de hesch also nüd z vrliire.

Seisch uns am beschte an wellem Dag de vrbyy cho willsch und wie mr di chönne erreiche.
Persönlichi Agobe wie Vorname, Name und dini E-Mail sin in dere Ziit mit dere Pandemi bsunders wichtig.

E guete gsunde Tip, 
bliibt immer Fit.
Wends nid bisch, kaschs no wärde,
und zwar bi uns, do uff dr Ärde.
Möchtsch e mol kho iine luege?
no so gärn, mit Vergniege.
Mir zeige Dir wie das alles goht,
denn lersch wie me im Schiff in stoht.
Stachle und ruedere wirdsch praktiziere,
und das alles ohni Di z'strapaziere.
Also mach au Du bi uns mit,
Denn wirsch oder bliibsch Fit.

© by ReGo